میشه خوند!

‫مه سه پيش بمو
راس راسيه

سلام
اگه آملي گپ بزوئن بلد نيني يا حوصله ناينني، نخوننين، زياده، شه مه حوصله سرشونه امروز داشتمه امومه اداره، معمولا كمتر از يكساعت طول كشنه. نمه چي سر، انه شلوغ بيه ، دو ساعت و نيم طول بكشيه. بديمه خله شلوغه، مه فكر بورده سي سال پيش. همتي داشته مه ا مومه، ماشين دله شه جا خنه كردمه. بئوتمه بنويسم، شايد شما هم اتي خننه بكنين.

اون موقع اداره كشاورزي آمل ديمه. عما شيمي ده مه ، سركشي. بينجه گر ره كتمي شه زمينه كل هاكنن (شخم بزنه) ،او دووننه تا کرم مرم بميره.اونروز پنشمه بيه بوردمي سرخه رو كار تموم بييه، داشتمي ا مومي ، برسيمي محمودآباد ،بئوتمي بوريم ماهي بووينيم. زمسسون بيه. اتا گت ماهي آزاد بديمي، بپرسيمي چننه؟ يارو بئوته فروشي نيه!همتي اشيمي ،اتا تهروني بمو بپرسيه : اين ماهي چننه؟يارو بئوته 4500 تمن.تهروني هايده ،هدا پاك هاكرده ، بورده. ماهي روش ،عما ره هارشيه بفهمسسه عمه حقوق ماهي 6500تمن به اين ماهي نخينه. بوردمي تماشا. كت ماهي سفيد بيه 150تمن. كته اورنج 80 تمن ، كته كفال 30 تمن ، مرغابي 40 تمن،پر الله اتا 15 تمن، چارتائي (كشتل)4تا 30 تمن. همينجوري داشتمي اشيمي و شه سه،  شيشم کشیمی که يكدفه بديمي اونورتر اتا كوفا سيو غاز سر به سر دچيه.تا اونوخت اينجوري غاز ندي بيمي، جلوتر بوردمي بديمي ، اهه، كل شعبونه كه سمزن هسه و امو اداره ، وه ره سم دامي شيه مردم خننه سمپاشي، الان زمسسونه دره سيو غاز روشنه . داد زو روسي غاز ،روسي غاز ، اتا سي تمن. تا من و مه رفق ه بديه ، به مو سلام بكرده و بورده اون كوفا غازه دله پش پشو هاكرده ، دو تا گت غاز كه
هر كدوم 2-3 كيلو بيه در بيارده عمه سه ، بئوته كه مندس جان من شه مه رو شرمندومه.،ونه بوورين، عما گمي نا خوامي، وه گنه ونه بوورين. شمه سره درد نيارم. نفري اتا هادا عما ره و نفري 28 تمن عمه جا هايته. راه دكتمي بوريم آمل، برسيمي گالش پل .اتا نونوائي برگي داشته ،بئوتمي هرسيم اتي نون برگي هايريم. صف دله ديمي مه رفق اتا پير مردي گالش پلي جا بپرسيه(مشدي روسي غاز چيتيه؟مردي بئوته عما روسي سيكا بشنوسمي ،روسي غاز نشنوسسمي . وه ره بووردمي ماشين دله ،بديه ،بئوته ا وه شه دارغازه كا ،بخريني ؟ چي سه؟بمومي نونوائي جلو ، همينجور حرف زومي ، بديمي ،اتتي مردي گننه: دارغاز همون (اولي ه غرابه).من از وچه گي وختي پاسنگ كا كردمي ،اولي ه غرابه بشنوس بيمه و ترسيمه ونه جا. پاسنگ كا وختي هر كي بوورده بو ، اونتا كه بباخته ئ سه جريمه گيته، اولي قراب اتا از اون جريمه ها بييه. اتي بيه كه برنده اتا سنگ ه اشته شه دو تا دس دله ، شه انگيسه در حالت چنگلي بيتن قرار دا و بازنده وسسه تند شه دسسه ونه دو تا دسسه دله بووره و سنگ ه در بياره. برنده هم نامردي نكرده اتي چنگلي كيته كه آدم دس خون ا مو. گت گت مردم ه صف ه دله همديگه ره اشينه ، عما ره اشينه كچيك كچيك خننه كردنه. نون ه هايتمي و هر کدوم با شه دارغاز بوردمي شه خنه. خوشالي بكرد ، دارغاز ه در بياردمي. آقا، شمه چش روز بد ه نووينه ، مه زنا (خانمم) با اينكه خدا وره كي خله خار زنا و مهربون هسسه، تا دارغاز ه بديه بئوته وه چيه بخري؟ اسا مه ره دايني ، شروع هاكردمه اله وا،  وله وا تعريف هاكردن، كه انه خاره ،انه خشمزوئه......خلاصه اين بنده خدا هارشيه ، براي اولين کش در زندگي بئوته ،عبداله، من وه ره دس نزمه، بئر دم هاده. راسي چنه بخري؟مه ره گني، همينجوري بئوتمه ده تمن. بئوته دم ها ده ، قاله قضيه ره بكن.اسا مگه من شه تركي ه سر جر امه. بئوتمه ت ه كار نار من درس كمه ، خواسي بخر ،خواسي نخر. شروع هاكردمه ونه پر ها كردنه ، لامصب ونه گت گت پر مگه بكنني بونه. بوردمه مقراض بياردمه ونه گته پره مقراض ها كردمه . گته لوه ره او دكردمه بشتمه گازه سر تا جوش بمو. غازه بشتمه او دله و در بياردمه تا ونه پر ه بوجم. مگه سر كننه؟ دوباره و سه باره تا نيمساعت جوش اوه دله دييه، در بياردمه پر هاکنم ، اون سرماي زمسسون دله بوردمه ايوون. به هزار بد بختي پر
هاكردمه . پته نيك(گاز پیک نیک) ه بووردمه سره پيش ، روشن هاكردمه تا دارغازه بل هادم(روی شعله بگیرم تا پر های ریزش بسوزد).
آخر سر نه خار بل هدا بيه نه هيچچي. دارغاز شه كم سيو بييه، ونه پز هم بسوته ،اتي مه دس و بال ه سيو هاگرده مثل کوره چي ه دس. به بد بختي دس و غاز ه بشوردمه، اسا ونه بتيممه چاك هدامه. ونه ريه ،روده ره در بكردمه ، بوردمه ونه چنگ (چینه دان)ه در بيارم ، بديمه، اتا گته هسسه . در بياردمه پاره هاكردمه، بديمه ونه دله دوتا
ماهي 10-15 سانتي كولي و 2 تا ماهي كله و اتي ماهي ه هسسه كا پيله كا و اتا وگ نصفه نيمه در بمو. آقا، ايهانه در بياردمه. اين دارغازه 3 كيلوئي، بييه كمتر از يك كيلو.اينا ره مه زنا بديه ،مگه لوه دنه من وه ره به لم ونه دله، بپجه؟ خلاصه به گردن دكتي ، اتا لوه بيتمه و ه ره بشتمه ونه دله و نمك و فلفل و زرديجه بزومه و او دكردمه ، بشتمه مطبخ ه گازه بالا . نيمساعت نگذشته گننه به ( بوی گند)در بمو .همه جائه خننه ره گننه به ، سر هيته. مه زنا بئوته: بئر در
بور وگرنه با لوه دم دمه ديا . ناچار بيمه لوه و گاز پته نيك ه بوردمه ايوون سر. اسا ديگه، شو بييه، دو ساعت دره جوش خينه، گننه به ، تمام عمه ايوون و خنه و سره پيش ه بن هايته ولي هلا چنگال ونه گوشت دله فرو نشونه. لامصصب مثل آهن سفت بييه. بالاخره مه ره وادار هاكردنه چراغ والور بيرم بلم وسط سره پيش و لوه ره بلم ونه سر، او مشت هاکنم تا صب ، يواش يواش بپجه .نصفه شو بوردمه 2-3 كش او دكردمه. آقا، صب پره سامه بوردمه سره پيش ، بديمه عمه همساينون كوچه دله در شوننه ، شه دماغه بييتنه و همينجور، مخ مخي(تو دماغی) گننه: مثل اينكه اينجاهار، ملاره بامشي دم هدانه. منم شه رو نياردمه. تا ظهره گدر سر دييه .اسا، همساينون كننه :مللاره بامشي انه به نكنه كا ، حتمن مللاره سگ اينجاهار كته. اتا تيكه ونه گوشت ه با كارد خواسسمه بوورينم، لامصصب مثله رسن كه خاره ، مثله سيم بكسل سفت بيه. چه شمه سره درد بيارم ، نماشون گدر اتا كمه دننون بكشيمه ، بديمه ، واقعا هم نشنه بخردن! هم اتي به كرده ، نتونسسمه سطل آشغال ه دله دم هادم . سه لا اوچچين د په تمه ( لای سه تا کیسه زباله پیچیدم.)، اي گن كرده، بالاخره بوردمه كشتاركاه نزيكي چن تا ول سگ دينه ، دم هدامه وشون ه پلي و فرار هاكردمه . ولا ياد بكردمه بئو ئم اولين جوش که بزومه، بديمه به كننه ونه دله 2-3 تا پياز دمه دامه، بديمه نبونه، سير بشتمه نييه، دارچوب(دارچین نکوبیده) دكردمه، اي به كرده، چند تا برگ بو بشتمه تازه اينجوري بييه.

راسش مه رفق چون بديه ونه زنا مخالفه و شه هم انه دس و پا دار نييه، همون اول دمه دا و شه جان ه خلاص ها كرده. آقاکه ت ه باشی،

زمسسون تمام بيه و بهار بمو و كل شعبون بمو اداره سم دمال .هم مه ره خنه گيته هم خواسسمه دونم چی سه عما ره بروته؟ بپرسيمه عمو شعبون چه عما ره بروتي ؟بئوته هيشكي نخريه، بئوتمه لااقل دو تا شما ره بروشم..از آون به بعد كل شعبون هر وخت، امو اداره سم خواسسه، اول عمو اسرافيل (امه آبدارچي )ره پرسيه قهقائي آقات تله يا نا؟ اگه بدي بو نا تل نيه، لب لب ه خن كرده امو سم گيته شيه.

شمه سر ره درد بياردمه . من كه هلا اون کار ره ياد ايارمه، آننه خنه كمه ،مه چش او مشت بونه ،نممه شمه چش هم مثه اينكه از خسسه گي و بي مزه اي شايد الان او جم بيه. ببخشيد .

شمه فدا :عبداله قهقائي‬